معلمة .تلميذ

  • واقعة مؤثرة جدا لمعلّمة في المدرسة الابتدائية حي الرياض ببرج السدرية

    كتب احدى المعلمات و المساة اريج  ما يلي :

    “اليوم صارتلي حاجة خلاتني نعرف لي بالرسمي التونسي للتونسي رحمة .. مانجمنش نصبر اكثر من هكا بش نحكيهالكم..

    يا سيدي الجمعة لي فاتت فما تلميذ(ة) تعرض(ت) لبارشا تنمر من التلامذة لي في قسمي .. السبب : الشخص لي تعرّض للتنمّر قال لاصحابو انو ماهوش بش يشري دبش عيد و لعب خاترو ما ينجمش و ما عندهم فلوس ..الشخص هذا حتى كي قالها .. قالها بكل قناعة لكن الكلام متاع صحابو قد ما حاولت نوقفو .. الاثر متاعو كان واضح في نفسية التلميذ(ة)

    في اخر الحصة جاوني زوز تلامذة قالولي : ستي مبعد ماريت اللي صار .. نحب السبت الجاي نشري لبسة عيد و حاجات جديدة للتلميذ(ة) الي تنمرو عليه(ا) اصحابي ..

    قلتلهم : اي فكرة هايلة تنجمو تتلمو انتي و اصحابك و كل واحد فيكم يجيب الي يقدر عليه و تمشيو تشريو حاجات مزيانة تفرحوه(ا) بيهم ..

    سمعونا تلامذة اخرين قعدو يخططو و يبرمجو .. و روحنا ..

    نسيتها انا الحكاية ، ماكم تعرفو الصغيرات ديما يحكيو يبرمجو و مبعد ينساو .. ماراعني الا .. اليوم الصباح جاوني 5 بنوتات كل وحدة في يدها فلوس (مبلغ لا بأس به) و قالولي : ستي احنا قررنا كل شيء .. ناقص كان شكون بش يهزنا .. (و هوما يقصدو عليا انا )

    تفاجئت انا و فرحت بارشا كي ريتهم شادين صحيح و عازمين ( و بالمناسبة هذه نحب نشكر اولياءهم لي أمّنوني على بنياتهم و عطاوهم الفلوس و شجعوهم على العمل الخيري هذا و القيم هذه لي بش يبقاو يعيشو بيها للأبد)

    كملنا القراية طلعنا في الكرهبة و قصدنا ربي لحي رياض برج السدرية .. دخلنا فيه لتقريبا 4 حوانت .. كل boutique دخلنالو ودّنا بحاجة .. فلوس ، عاونونا في السوم ، وسعو بالهم معاهم ، اختارو معاهم ، كلمة طيبة و ضحكة مزيانة ، دعيوة خير و فما حتى لي تبرعت بلبسة كاملة للتلميذ(ة)

    و في هذا الكل نغزر لبناتي بكل فخر و حب .. كان تراوهم كيفاه يختارو في الدبش و اللعب و الله تقول يختارو لرواحهم و الا خواتهم .. و يحكيو مع كل انسان قبل مايشريو من عندو بش يعاونهم في السوم بش ينجمو يوفرو اكثر حاجات للتلميذ(ة)

    مشينا على لبسة وحدة نلقاو رواحنا مروحين بلبستين و بارشا زينة اخرى و لعبة ..

    تعدينا للبحر شمينا النسمة البنينة متاع بلادنا ، غنينا بارشا و شطحنا و تفرهدنا و مبعد روحنا ..

    و بالمناسبة نحب نشكركم الكلّ .. لي ساهمتو في نشر الحب مع بنياتي اليوم .. اي انسان ساهم بأي حاجة سوى فلوس و الا هدية و الا لبسة و الا كلمة طيبة .. راكم علمتو الصغيرات معنى الكرم ، معنى التعاون، معنى الحب ، معنى الزكاة ، معنى المساعدة ، معنى السلام ، معنى الرحمة و الاخوة ..معنى تونس .. علمتوهم لي بالرسمي تونس مزيانة و عبادها مزيانة و الخير مازاااااااااال في الدنيا هذه .. محلاكم يالّي تنشرو في القيم الجميلة في صغارنا و حتى كبارنا ..

    محلاها بلادي و ماحلاهم ناس بلادي ❤️

Adblock Detected

Please consider supporting us by disabling your ad blocker